Na Idade Media, pronto se estendeu por Europa a sona do descubrimento da tumba do Apóstolo e aínda que moitos peregrinos europeos facían a viaxe por terra tamén moitos outros (sobre todo de países mais lonxíncuos) facíano por mar desde os portos do sur de Inglaterra. Uns con chegada á Coruña e outros a Ferrol, para logo continuar a pé ata a catedral de Santiago.

A historia desta ruta comeza en 1147 cando foi utilizada por primeira vez polos membros dunha escuadra de cruzados europeos que ían a Terra Santa. Logo tivo momentos de gran afluencia. Sábese, por exemplo, que no ano 1434 arribaron á Coruña máis de 3000 peregrinos. Comezou a decaer no s. XVI coa reforma luterana e a ruptura de Enrique VIII co Igrexa católica. Estivo esquecida varios séculos ata que modernamente foi recuperada. Hoxe está recoñecida coma camiño delimitado oficialmente.

Ten dúas variantes iniciais, a da Coruña e a de Ferrol, confluíndo ambas na parroquia de Bruma, Concello de Mesía (onde se localiza a aldea Hospital, chamada así porque en 1175 se erixiu alí un hospital de peregrinos, o primeiro dese camiño). Desde alí Santiago está a uns 40 km.
A distancias a percorrer son duns 112 km. dende Ferrol e só 73 dende A Coruña. (Esta ultima por ser menos de 100 km. non permite a obtención da Compostela.)