Hoxe o río Miño atravesa a cidade, pero Ourense non naceu á beira deste río senón na cunca do Barbaña. Foi concretamente ó carón das fontes das Burgas, nas ladeiras de Monte Alegre, vertente pola dereita do val dese río.

A cidade mantívose durante varios séculos cun perímetro inalterado e unha área restrinxida -os arredores das Burgas e da praza Maior- e non foi ata mediados do século XIX cando encetou o seu desenvolvemento ó tempo que ían asomando novos casaríos nas distintas estradas que se acababan de construír (Villacastín a Vigo, Monforte, Trives, Celanova, ... Santiago, en Canedo, etc.)